Гӯштин ба ҳолати пештара бармегардад
Гӯштингирӣ яке аз қадимтарину писандидатарин навъи варзиш миёни мардуми тоҷик аст. Ҳазорсолаҳост, ки он миёни мардуми тоҷик шукӯҳу шаҳомати худро нигаҳ медорад ва дар ин давра ҳазорҳо диловарони тоҷик бо ин навъи варзиши пурифтихор майдондорӣ мекунанд. Имрӯз низ бо пайдо гаштани варзишҳои гуногун гӯштингирӣ манзалати худро аз даст надодааст, ки далели ин ба майдон омадани садҳо паҳлавонони сатҳи ҷаҳонӣ дар Тоҷикистони имрӯза аст.
Вале ҳудуди як соли охир бо пайдо шудани пандемияи коронавирус дар қатори аксар фаъолиятҳо гӯштингирӣ низ камранг аст. Бо далели баргузор нагаштани мусобиқаҳои сатҳи минтақавию байналмилалӣ ҳунарнамоии паҳлавонони тоҷик низ ба чашм намехӯрад. Мо тасмим гирифтем, ки аз вазъи кунунӣ ё баъдипандемияии гӯштини тоҷик огаҳ гардем.
Чуноне ки аз мушоҳидаҳо ба назар мерасад, аксари толорҳои варзишӣ пас аз давраи пандемия дубора ба фаъолият оғоз кардаанд. Чунончи дар Донишкадаи тарбияи ҷисмонии Тоҷикистон ба номи С. Раҳимов, ки макони асосии тайёр кардани мутахассисони соҳа аст, аллакай чанд моҳ аст, ки ба варзишгарону донишҷӯёни риштаи мазкур дарсу тамринҳо гузаронида мешавад. Мо зимни суҳбат бо донишҷӯёну омӯзгорон дарёфтем, ки аллакай ба таври бояд дарсҳо ҷараён доранд ва бо ба инобат гирифтани меъёрҳои беҳдоштӣ донишҷӯён аз нозукиҳои ин навъи варзиш бархӯрдор гашта истодаанд. Дар дигар муассисаҳо ва толорҳои варзишӣ, ки ба тайёр кардани мутахассисони ҳамин соҳа равона гардидаанд, аллакай тамринҳо ба таври маъмулӣ ҷараён доранд.
Бо чанде аз мутахассисон ва масъулини соҳа ҳамсуҳбат шудем ва ҷиҳати оғоз гардидани мусобиқаҳои дохили ҷумҳуриявӣ ҳам чанд маълумот пайдо кардем.
Суҳроб Бозоров, ҷонишини директор оид ба таълими Муассисаи давлатии марказии ҷумҳуриявии тайёрии олимпии дастаҳои мунтахаб зимни суҳбат гуфт, аллакай чанд моҳ аст, ки мусобиқаҳои минтақавию ҷумҳуриявӣ ба таври густурда ҷараён доранд.
- Аз намуди гӯштин ҳамасола дар Тоҷикистон ва ҷаҳон бисёр мусобиқаҳо баргузор мешаванд. Мутаассифона, имсол аз сабаби бемории сироятии коронавирус танҳо дар семоҳаи аввал якчанд мусобиқа доир гашту халос. Ҳоло бошад, мусобиқаҳо ба нақша гирифта шудаанд,-иброз дошт ӯ.
Ба гуфти С. Бозоров давоми сол бо истиснои давраи пандемия 26 мусобиқа аз 5 намуди гӯштин: гӯштини юнону румӣ, гӯштини тарзи озод, гӯштини самбо, гӯштини миллӣ ва гӯштини дзюдо баргузор гардид, ки аз онҳо 11 мусобиқаи ҷумҳуриявӣ, 11 мусобиқаи байналмилалӣ ва 4 чемпионати ҷумҳуриявӣ буданд. Дар мусобиқаҳои ҷумҳуриявӣ аз намуди гӯштини юнону румӣ 3 мусобиқа, гӯштини тарзи озод 3 мусобиқа, гӯштини самбо 2 мусобиқа, гӯштини миллӣ 2 мусобиқа ва як мусобикаи дигар аз намуди гӯштин дзюдо баргузор гардид. Дар мусобиқаи байналмилалӣ бошад, аз намуди гӯштини тарзи озод 2 мусобиқа, гӯштини юнонӣ-румӣ 2 мусобиқа, гӯштини самбо 2 мусобиқа ва 3 мусобиқа аз намуди гӯштини дзюдо байни наврасону ҷавонони муассиса доир гашт. Дар чемпионати ҷумҳуриявӣ бошад, аз намуди гӯштини дзюдо 1 мусобиқа, гӯштини тарзи озод 1 мусобиқа, гӯштини юнонӣ-румӣ 1 мусобиқа ва 1 мусобиқаи дигар аз намуди гӯштини миллӣ баргузор шуд.
- Аз рӯи нақша 3 мусобиқаи ҷумҳуриявӣ дар назаранд, ки дар вилояти Суғд аз намуди гӯштини дзюдо, аз намуди гӯштини юнонӣ-румӣ дар шаҳри Истаравшан, аз намуди гӯштини тарзи озод дар ВМКБ, ки ин ҳам мусобиқаи ҷумҳуриявӣ байни калонсолон аз 18-сола боло, ки аз ҷониби Федератсияи гӯштини Ҷумҳурии Тоҷикистон, Кумитаи миллии олимпии Ҷумҳурии Тоҷикистон ва Раёсати кор бо ҷавонон ва варзиши ВМКБ ва 4-уми ноябр бошад, чемпионати ҷаҳон, ки дар давлати Сербия доир мегардад, иштироки варзишгарон аз намуди гӯштини самбо дар назар аст. Дар мусобиқаҳои ҷумҳуриявӣ иштироки зиёда аз 45-50 варзишгар дар назар аст. Дар чемпионати ҷаҳон бошад, 3-4 нафарро ба кумита пешниҳод кардаем,- илова кард, Суҳроб Бозоров.
Мудири кафедраи варзиши миллии ДТҶТ Хуршед Ибайдуллоев вазъи кунунии гӯштинро дар донишкада чунин шарҳ медиҳад, ки дар соли 2020 аз аввали сол то чанд моҳе қабл қариб ҳеҷ мусобиқа баргузор накарда буданд. Аммо бо беҳбуд ёфтани вазъ эшон низ ба барпо кардани мусобиқаҳои гуногунсатҳ шурӯъ кардаанд.
- Мо аз рӯи нақша ҳар сол аз 8 то 10 мусобиқа аз намуди гӯштини миллӣ баргузор мекардем, ки 4 мусобиқааш байни калонсолон буд. Варзишгарони мо дар ин мусобиқаҳо ҳамасола иштирок карда, ҷойҳои намоёнро ишғол мекарданд. Вале имсол бо сабабҳои маълум ин мусобиқаҳоро дер шурӯъ кардем. Ва то имрӯз тавонистем чанд мусобиқа баргузор намоем. Дар нақша ҳам дорем, ки якчанд мусобиқа баргузор намоему дар мусобиқаи дигар варзишгаронамонро сафарбар кунем. Аз рӯи нақша 6-уми ноябр бахшида ба Рӯзи Конститутсияи Ҷумҳурии Тоҷикистон дар шаҳри Хуҷанд миёни наврасону ҷавонон мусобиқа баргузор мешавад ва мо ният дорем, ки гӯштингирони беҳтаринамонро ба ин мусобиқа сафарбар намоем. Баъд аз он миёни наврасон охирҳои моҳи ноябр ё аввали декабр, ки санаи дақиқаш ҳоло муайян нест, дар ноҳияи Данғара мусобиқаи ҷумҳуриявӣ баргузор мешавад. Дир ин мусобиқа низ мо иштироки варзишгаронамонро дар назар гирифтаем,- гуфт, Хуршед Ибайдуллоев.
Варзишгарон низ ба мусобиқаҳо тайёрии ҷиддӣ дида истодаанд. Беҳрӯз Хоҷазода, қаҳрамони ҷаҳон оид ба риштаи самбо зимни суҳбат гуфт, ӯ айни ҳол ҷароҳат дорад ва имсол дар ягон мусобиқаҳои ҷумҳуриявӣ иштирок намекунад. Аммо ӯ бо дигар варзишгарон тамринро идома дода истодааст. Ӯ гуфт, дар мусобиқаи варзишие, ки 27-29 ноябр дар шаҳри Уланбатори Муғулистон баргузор хоҳад шуд. иштирок мекунад ва умедвор аст, ки натиҷаҳои назаррасро ноил гардад.
Бо ин ҳама метавон хулоса кард, ки варзиши тоҷик аллакай аз марҳилаи коронавирусӣ баромадааст ва дар моҳҳои наздик варзишгарони мо бо натиҷаҳои назаррас Парчами давлатро боло хоҳанд бардошт.
Манбаъ: http://javonon.tj/